Mae hi wedi bod yn bleser bod yn Lywydd ar Undeb Myfyrwyr Cymraeg Bangor eleni. Teimlaf fy mod wedi medru rhoi ychydig yn ôl i’r gymuned sydd wedi fy siapio fel person ac oedolyn ifanc, a dyna yn y bôn yw’r rheswm pam wnes i redeg am y rôl yn y lle cyntaf. Teimlaf fod y swydd hon wedi fy mharatoi ar gyfer y byd gwaith ehangach hefyd gan feithrin ynof nifer o sgiliau hanfodol y gweithle proffesiynol.  

Wrth i mi redeg am ail dymor hefyd roeddwn yn medru adlewyrchu ar y flwyddyn roeddwn eisoes wedi’i chael eleni. Edrychais nôl ar fy maniffesto ac ymgyrch o llynedd ac er nad wyf wedi medru cyflawni pob nod arno, roedd hyn yn amlygu’r angen i mi barhau am flwyddyn arall fel medraf ddatblygu’r syniadau/ymgyrchoedd yma rwyf bellach wedi dechrau arnynt e.e. ymgyrchu’n fewnol gyda’r brifysgol am adnewyddiadau i neuadd preswyl John Morris-Jones.  

Rwy’n ffodus iawn o sefyllfa cyfforddus safonau’r Gymraeg o fewn Undeb Bangor a’r Brifysgol yn gyffredinol eleni fel roedd modd i mi droi fy ngolwg tuag at elfennau allanol byddai’n cael effaith ar ein safonau a pholisïau iaith Gymraeg. Gyda chymorth fy nghyd-weithwyr o fewn yr Undeb, roeddem wedi medru cyflwyno syniad polisi iaith Gymraeg a dwyieithrwydd ar gyfer cynhadledd flynyddol Undeb Cenedlaethol Myfyrwyr Cymru. Cynhaliwyd y gynhadledd yma ym Mangor ar yr 22ain o Fawrth yn ein Hwb Gweithgareddau. Rwy’n falch o ddweud i'r syniad polisi a phob gwelliant gael ei basio. Hyfryd hefyd oedd clywed cefnogaeth bositif tuag at y polisi gan yr holl gynrychiolwyr myfyrwyr addysg uwch ac addysg pellach oedd yn bresennol yn y gynhadledd.  

Ond, er i mi gael blwyddyn wych, ni ddaeth hynny heb ei heriau. Rwy’n credu mai dau brif her rwyf wedi eu wynebu eleni yw ymgysylltu gyda myfyrwyr a darparu’r profiad gorau i fyfyrwyr trwy’r argyfwng costau byw. Mae’r ddau yn gysylltiedig a dweud y gwir. Mae nifer o ddigwyddiadau traddodiadol UMCB megis y Ddawns Ryng-golegol yn medru bod yn gostus. A gyda ninnau mewn argyfwng costau byw, mae myfyrwyr eleni wedi gorfod wynebu’r her anffodus o flaenoriaethu naill ai fforddio eu bywyd cymdeithasol neu fforddio eu lles a chostau dydd i ddydd h.y. siopa wythnosol a rhent. Oherwydd hyn, nid yw myfyrwyr wedi medru ymgysylltu gyda’n digwyddiadau cymdeithasol fel yr arfer, felly rydym wedi ceisio addasu rheiny fel eu bod yn fwy fforddiadwy. Enghraifft o hyn oedd pan daeth hi i’n noson Gloddest i ddathlu’r Nadolig, cynhaliais trafodaethau gyda lleoliadau lleol er mwyn sicrhau ein bod yn medru cael y dewis gorau o ran cost ac ansawdd ar gyfer cynnal y digwyddiad.

Rhaid dweud mai uchafbwynt y flwyddyn i mi oed yr Eisteddfod Ryng-golegol. Cynhaliwyd yr Eisteddfod eleni lawr yn Llanbedr Pont Steffan ar gampws Prifysgol Cymru Y Drindod Dewi Sant ar benwythnos y 3ydd-4ydd o Fawrth. Rwy’n falch o ddweud ein bod wedi ennill yr Eisteddfod am yr 8fed mlynedd yn olynol , felly’n dod a’r darian ryng-golegol nôl i’r gogledd am flwyddyn arall. Does dim teimlad wedi dod yn agos yn ystod y flwyddyn hwn i’r un cefais pan godais y darian hwnnw wedi iddi gael ei chyhoeddi mai ni oedd yn fuddugol. Y foment hwnnw oedd yn gwneud yr holl waith caled trwy gydol y flwyddyn diwethaf yn werth hi.