Os oes gennych ddiddordeb mewn digwyddiadau trac a maes, traws gwlad, rhedeg ffyrdd neu redeg yn achlysurol er mwynhad yna Athletau Bangor yw'r clwb i chi. Rydym yn darparu ar gyfer pob lefel gallu a phrofiad, p'un a ydych yn ddechreuwr llwyr neu'n athletwr o safon genedlaethol, mae croeso i bawb!

Mae yna ddigonedd o rasys a chystadlaethau trwy gydol y flwyddyn i athletwyr ymarfer ar eu cyfer, yn amrywio o lefel leol i lefel genedlaethol. Mae prif rasys y clwb yn cynnwys: y Bencampwriaeth Ryng-golegol, cynghrair traws gwlad Gogledd Cymru, ras 10k a ½ marathon Ynys Môn , traws gwlad Chwaraeon Prifysgolion a Cholegau Prydain (BUCS), cystadlaethau trac dan do BUCS a thrac awyr agored BUCS.

Cynhelir hyfforddiant bob nos Lun, nos Fawrth a nos Iau gyda nosweithiau cymdeithasol ar nos Fercher. Mae athletau yn ffordd wych o gwrdd â phobl o'r un anian ac rydym yn ymfalchïo yn awyrgylch cyfeillgar, teuluol y clwb.