JMJ (John Morris-Jones) yw neuadd breswyl Gymraeg Prifysgol Bangor, hi yw calon y gymuned myfyrwyr Cymraeg. Gyda’i neuadd gyffredin ei hun, mae JMJ yn cynnal ystod eang o weithgareddau cymdeithasol drwy gydol y flwyddyn, gan gynnwys partion, twrnamentau dartiau, ymarferion côr, a llawer mwy. Mae awyrgylch groesawgar i’w gael yn JMJ ac mae preswylio yno yn cynnig cyfleoedd i’r myfyrwyr ffurfio cyffeillgarwch oes a chreu atgofion bythgofiadwy.

Clybiau chwaraeon cyfrwng Cymraeg Bangor yw Chwaraeon y Cymric, mae’n cynnig cyfleoedd i fyfyrwyr hyfforddi a chystadlu mewn ystod eang o chwaraeon, gan gynnwys, pêl-rwyd, hoci a dartiau. Mae’r timau’n hyfforddi’n wythnosol, gan gystadlu yn erbyn clybiau Undeb Athletaidd Prifysgol Bangor, ac yn falch o gymryd rhan yn y gystadleuaeth flynyddol yn erbyn Y Geltaidd sef Prifysgol Aberystwyth. P’un a’i dy fod yn chwaraewr profiadol neu’n awyddus i roi cynnig ar rhywbeth newydd, mae gan Chwaraeon y Cymric rhywbeth at ddant pawb.

Wyt ti’n awyddus i wella dy Gymraeg tra’n cwrdd â pobol newydd? Mae’r Prosiect Ffrind Cymraeg yn cynnig cyfle i ddysgwyr ymarfer eu cymraeg mewn modd answyddogol ac ymlaciedig gyda siaradwyr Cymraeg rhugl. Mae’n gyfle euraidd i feithrin hyder, datblygu dy sgiliau iaith, creu ffrindiau newydd ac ehangu dy bosibiliadau cyflogadwyedd drwy gyfathrebu’n ddwyieithog.

Mae Cymdeithas John Gwilym Jones yn berffaith ar gyfer myfyrwyr sydd yn ymddiddori mewn llenyddiaeth Gymraeg, iaith a pherfformio. Mae’r gymdeithas yn annog ei aelodau i ddarganfod ystod eang o lenyddiaeth Gymraeg a ffurfiau ysgrifennu tra’n datblygu sgiliau creadigol, dadansoddol a pherfformio mewn awyrgylch gefnogol.

Mae lles myfyrwyr yn flaenoriaeth gennym yn UMCB. Sefydlwyd Siop Siarad gyda’r nod o godi ymwybyddiaeth o iechyd meddwl a lles o fewn y gymuned o fyfyrwyr Cymraeg. Mae’r prosiect, o gymorth i godi ymwybyddiaeth myfyrwyr o’r gwasanaethau lles Cymraeg ar gael, sicrhau bod pawb yn ymwybodol o ble y gallant ddarganfod cymorth a ffurfio cymuned groesawgar a chefnogol ble nad oes neb yn teimlo’n unig.

Côr Cymraeg Prifysgol Bangor yw Aelwyd Jmj ac mae’n croesawu cantorion o bob gallu. Mae’r côr yn ymarfer yn wythnosol ac yn perfformio’n gyson drwy gydol y flwyddyn. Yn adnabyddus am ei llwyddiannau yn Eisteddfod Genedlaethol yr Urdd, mae Aelwyd JMJ yn parhau i gynrychioli’r gymuned o fyfyrwyr Cymraeg eu iaith drwy eu perfformiadau ar draws Cymru. Ochr yn ochr â’r gerddoriaeth mae’r aelodau yn mwynhau’r calendr cymdeithasol sydd yn sicrhau bod y côr yn ffordd wych o gyfarfod pobol newydd ac yn cyfoethogi’r profiad o fod yn y brifysgol.

Y Cymric yw adain gymdeithasol UMCB. Caiff ei arwain gan pedwar swyddog myfyriwr etholedig sydd yn gyfrifol am drefnu rhai o ddigwyddiadau mwyaf poblogaidd y gymuned drwy gydol y flwyddyn. O Clwb Cymru (ein noson gwisg ffansi chwedlonol) a nosweithiau cwis cyson i Pentre Bach, sef taith o amgylch tafarndai mewn pentref lleol, a nifer o ddigwyddiadau eraill. Mae’r Cymric yn sicrhau bod yna wastad rhywbeth i edrych ymlaen ato. Mae’r digwyddiadau hyn yn gyfle gwych i wneud cyfeillgarwch oes, dathlu diwylliant Cymraeg, a chreu atgofion bythgofiadwy yn ystod dy gyfnod ym Mhrifysgol Bangor.