Dydd Llun 18-05-2026 - 09:48

Cafodd myfyrwyr gwirfoddol sydd wedi dangos ymroddiad eithriadol i gefnogi eu cymuned leol eu cydnabod yng Ngwobrau'r Uchel Siryf 2026, a gynhaliwyd yn Siambr y Cyngor, Prifysgol Bangor ar brynhawn 15 Mai 2026.

Mae'r gwobrau blynyddol yn dathlu'r cyfraniad anhygoel y mae myfyrwyr Prifysgol Bangor yn ei wneud trwy wirfoddoli ac ymgysylltu â'r gymuned. Wedi'u sefydlu yn 2007 gan y cyn-Uchel Siryf ac Aelod Cyngor y Brifysgol, Dr Dewi Roberts, a'i ddiweddar wraig, Dr Sheila Roberts, crëwyd y gwobrau i gydnabod ac anrhydeddu myfyrwyr sy'n mynd yr ail filltir i wneud gwahaniaeth cadarnhaol yn y gymuned.

Tynnodd seremoni eleni sylw at effaith nodedig myfyrwyr gwirfoddol ar draws ystod eang o brosiectau ac achosion, o gadwraeth amgylcheddol a mentrau iechyd i gefnogaeth niwroamrywiaeth ac allgymorth cymunedol.

Canmolodd yr Athro Enlli Thomas, Dirprwy Is-Ganghellor (Yr Iaith, Diwylliant a'r Rhanbarth), y myfyrwyr am eu hymroddiad a'u hangerdd:

“Rydym wedi ein plesio'n fawr gan ymrwymiad eithriadol ein myfyrwyr i wneud gwahaniaeth. Mae eu gwaith gwirfoddol yn cwmpasu ystod ysbrydoledig o feysydd, o niwroamrywiaeth ac iechyd i gadwraeth amgylcheddol, gan amlygu nid yn unig eu chwilfrydedd deallusol, ond hefyd ymdeimlad dwfn o bwrpas a chyfrifoldeb dinesig.”

Enillwyr Gwobrau'r Uchel Siryf 2026

Categori Prosiect

Clwb Hedfan RSPB
Prosiect Cadwraeth Cynefin
Sbectrwm
Bangor Marrow

Categori Unigol

Arwen Wall
Katie Shepherd
Megan Judge
Ffion Brett-Hanlon
Alex Stace

Disgrifiodd Cydlynydd Gwirfoddoli a Chymuned Undeb Myfyrwyr Bangor y gwobrau fel cyfle pwysig i gydnabod yr ymroddiad a'r tosturi a ddangosir gan fyfyrwyr gwirfoddol drwy gydol y flwyddyn.

Dywedodd:

“Mae Gwobrau’r Uchel Siryf yn foment arbennig iawn i gydnabod yr ymroddiad, y caredigrwydd a’r gofal gwirioneddol y mae ein myfyrwyr gwirfoddol yn eu rhoi i’r gymuned. Maent yn rhoi eu hamser mor hael, yn aml yn dawel a heb ddisgwyl dim yn ôl, ac mae’n golygu llawer iawn gweld hynny’n cael ei gydnabod fel hyn.

Mae Gwobrau’r Uchel Siryf yn uchafbwynt yng nghalendr gwirfoddoli bob blwyddyn, ac mae’n anrhydedd cael y gwaith wedi’i gydnabod. Hoffai Undeb Bangor ddiolch i bob un o’n gwirfoddolwyr am eu gwaith caled a’u hymroddiad, a llongyfarchiadau i’r holl enillwyr.”

Unwaith eto, dangosodd y gwobrau’r effaith gadarnhaol y mae myfyrwyr Prifysgol Bangor yn parhau i’w chael ar y campws ac ar draws y gymuned ehangach, gan adlewyrchu’r diwylliant cryf o wirfoddoli ac ymgysylltu dinesig a gefnogir gan Undeb Bangor.